A Nupui Avanga Pastor Vakvai Leh Lainatawm Tak Chu

America ram zau taka maia ram bung pakhat Florida state, Miami-a selian ka nia kan unau hi 3 kan ni. Ka pa a boral hma avangin ka nu hian min enkawl seliana ka nau hi Georgia-ah pasal neiin a awm nghe nghe.

Ka pasal hi pastor niin a rawngbawlna hmun Wilson khawpuiah kan khawsa a ka nu leh ka nau Billy chuan kan inpui nghakin Miami ah hian an khawsa zui ve ta a ni.

Billy hian Suzy nupuiah neiin tlangval senior a nih tawh avang leh upat lama nupui nei a nih avangin a hlim ve hle thin a. Fapa an nei leh nghala hei hian a hlimna pawh a belhchhah nasa leh zual niin a hriat bawk. Hna thawh tur awm ang angte thawkin khawsak pangai takin an awm ve theih phah a ni.

Mahse, vanduaithlak takin kan chhungkaw chanchina a vawi 2 na atana vanduai dang a lo thleng leh ta! Billy chu a nupuiin a tlanbosan ta daih maia a tuar nain hmeichhia hrim hrim a huatphah a ni ber mai.

Mahse, hun a lo reia a fapa pawh lo thang lian ve zelin mittui nen a enkawl ve hram hrama a lunglenna pawh chu a kiang ve tan ta a, kan lawm ve em em thin a ni.

Vanduaithlak tak maiin a fapa pawh chu khawsikpui natna veiin a boral ve leh ta! Billy chu a mang angin awm ngaihna reng reng a hre ta lo. Zu a in nasaa mahni chauha pindan chhungrila inkhung hrante chu nuam a tih zawng tak a lo ni ta a a lainatawm hle mai.

Tuk khat chu ka nu hnenah Billy chuan in chhuahsana hla taka kalbo a tum thu a sawia ka nu chuan a phallo hle a mahse, Arizona, Phoenix lamah a kal chhuak ta nghe nghe a ni. Ka nu leh ka nau Billy chu hla tak atang chuan engtin nge an awm ang tih kan hre seng vek bik silo ka nu mawlh chu a lainatawm tak zet a ni.

Ka nu hian a ngai thei hle maia lehkha vawi engemaw zat thawnin leh phone hmangte a biak tum in a bei thina chhanna erawh a hmu ngai lo thung.

Tum khat chu ni lum aia pawnah kan thut reng lai chuan Phoenix lam atangin phone call a lo ri kar kar maia kan han pick taa ka nau Billy ruang Police stationah an kawl mek thu Detective fel takin min lo hrilh ta thut maia kan hamhaiha awm ngaihna pawh kan hrelo.

Rang takin a ruang awmna hmun lam panturin kan thlawkchhuak taa a hmun kan thlen chuan ka nau Billy ruang puanvara intuam chu ka kan hawnga kum 10 zet a hmel ka hmuh tawh loh ka nau ka ngaih em em chu thiin ka hmu ta a ni. Ka mittui a sur nasa em em maia Detective kan kianga ding reng pawh chu a insum thei bik lo.

Ka nu hawn atan Billy thawmhnaw awm ang ang leh a chenna hmunte ka zawt ta a Detective chuan Billy hian in a neih loh thu leh mi vakvai a nih thu min hrilh zuia ka thinlung chu a rum tak meuha awm ngaihna reng ka hre lo!

Tianga a thawmhnaw ka dil takah chuan Bag hlui tawh tak a rawn phawrh chhuaka a chhung kan han hai chuan Billy’an a thisen a hralhna receipt tam tak leh ka nuin Chrismas Card a thawn hlui tak takte bakah thingpui lumna atana a hman niawm tak satin bur ruak ung tak takte chu kan hmu ta a ka rilru na lutuk chu awm dan tur pawh thiam a har ngang mai.

Detective hnenah chuan ka nau Billy vuitu tur pastor min ngaihtuahsak turin ka hrilh ta a tlailam dar 3 velah chuan Chapel te tak teah ka nau mivakvai leh khawngaihthlak em em mai chu kan vui liam ta a ni.

Ka inthiam thei ngang lo! Kei a u pastor nupuiber pawh pan tlakah min ngai lova tiang a han vakvai ta mai chu hreawm ka ti ngawih ngawih a ni. Ka nu hnenah thil awmdan kan hrilh lo thei si lo! Ka nu pawh ka nau Billy boral hnu chuan a rilru nain a damrei bik lo hun rei vak loah chuan a boral ve ta bawk.

Ka nau Tulia leh a nupui chuan he kan in puiber hi hralhin mi vakvaite tanpui nan an dah tha ta a, Florida hmuna pi leh pute hun atang tawha ram zau tak mai kan neih pawh hralh vekin heng sumte hi mi vakvaite tan ka nu duhthusam angin Salvation Army kutah kan hlan ta a ni.

Billy thihna hian kan chhungkuaah daglamna min thlen nasa em em a mivakvaite kan lo hlamchhiah thinzia pawh Billy hmang vek hian kan hriat phah bawk. Tun thlengin helai hmun hi mi vakvaiten an pan nasa em em a in humhimnan tak lo hmang vein Billy thihna chuan thil ropui tak a thlen tih kan ngaihtuah chuan hlimna in kan khat ve thin.

Be the first to comment

Leave a Reply

Your email address will not be published.


*