Zu Rit Buin Rawchok (Cobra) Hnamh Aa Timmi Pa Rawchok Tu Nih A Hnamh

Rul tlaih thiam pa pakhat nih zu rit ngai buin a sivai ttih a nung tukmi rawchok (cobra) cu hnamh a timh. Hi thil hi India ram khua pakhat ah a cangmi thil asi i Christmas lai te ahkhan a cangmi thil asi.

Rul hnamh a timtu pa hi Sonu ti asi i rawchok nih a hmai zawn bak i a cuk caah hliamhma fak ngai he sizung ah an kalpi colh. Thil sining ah Sonu hi India ram Karnataka peng Bhadravati khuami hna nih December 24 ahkhan an khua ah rawchok an hmuh caah Sonu cu bawmhhal in an rak chawnh.

Minung kalnak ca an siammi Pavement zawn lung tang ah Sonu nihhin rawchok cu a rak tlaih khawh. Rawchok a tlaih khawh hnuin mah le mah zumhnak a ngei ngaimi Sonu nih rawchok cu lentecelhnak ah a hun hman tthan.

Rawchok cu a lu zawn ah hnamh a hun timh i cu lio ahcun rawchok nih a hmur zawn le a hmai zawn bak ah amah tu kha a cuk hi asi. Mi tampi an hun au cio hna i Sonu cu caan rau lo te ah a hmai in thi a hung chuak thluahmah.

A hramthawkka ah Sonu hi Bhadravati khua sizung ah an rak kalpi nain cuka sizung nihcun Shimoga khua ummi Mcgann sizung ah kal dingin an rak fial tthan hna. Sibawi te nih Sonu hi tlai lo tein sizung a phanh ruangah a nunnak a himnak asi tiah an chim.

Rul a cuknak hliamhma ruangah a hmai tu cu ni 10 lengkai a phing i a duk ve. A tucu damlei a panh cuahmah lio asi tiah theih asi. Sonu nih hibantuk rul a tuaitam lio hi video ttha tein an rak thlak dih i mi cheukhat nihcun amah tu sual an phawt ve. Source:metro

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.